کیٹی پیری اور جسٹن ٹروڈو کا ریڈ کارپٹ ڈیبیو، افیئر کی افواہیں حقیقت میں بدل گئیں

امریکی پاپ اسٹار کیٹی پیری اور کینیڈا کے سابق وزیر اعظم جسٹن ٹروڈو نے پہلی بار عوامی سطح پر ایک ساتھ ریڈ کارپٹ پر شرکت کرکے اپنے مبینہ تعلق کی افواہوں کو نئی حقیقت کا رنگ دے دیا ہے، جس کے بعد سوشل میڈیا پر شدید ردعمل اور بحث چھڑ گئی ہے۔ 8 جون کو نیویارک میں منعقد ہونے والے ٹریبیکا فیسٹیول میں کیٹی پیری کی نئی دستاویزی فلم کے پریمیئر کے موقع پر دونوں ایک ساتھ پہنچے۔ جیسے ہی یہ جوڑا ہاتھوں میں ہاتھ ڈالے ریڈ کارپٹ پر نمودار ہوا، کیمروں کی توجہ مکمل طور پر ان پر مرکوز ہوگئی اور یہ لمحہ ایونٹ کا سب سے زیادہ زیرِ بحث حصہ بن گیا۔ یہ تقریب بظاہر کیٹی پیری کے نئے پراجیکٹ کی لانچ کے لیے تھی، تاہم دونوں کی مشترکہ آمد نے تمام توجہ اپنی طرف مبذول کر لی۔ ریڈ کارپٹ پر دونوں نہایت پُراعتماد اور خوشگوار موڈ میں نظر آئے، فوٹوگرافروں کے سامنے پوز دیتے رہے اور مداحوں کے ساتھ بھی مسکراتے ہوئے ملاقات کرتے رہے۔ تقریب کے دوران صورتحال مزید واضح اس وقت ہوئی جب کیٹی پیری اپنے مداحوں کے ساتھ مصروف تھیں، آٹوگراف دے رہی تھیں اور سیلفیاں بنا رہی تھیں، جبکہ جسٹن ٹروڈو مسلسل ان کے ہمراہ موجود رہے۔ یوں پوری تقریب کا فوکس فلم کے بجائے اس مبینہ جوڑے کی موجودگی بن گیا۔ کیٹی پیری کی یہ دستاویزی فلم، جس کی ہدایت کاری پال ڈگڈیل نے کی ہے، ان کے نومبر 2025 کے پیرس کنسرٹس کی جھلکیوں پر مشتمل ہے اور اسے ساٹھ سے زائد کیمروں کی مدد سے فلمایا گیا ہے۔ تاہم فیسٹیول میں موجود دیگر پروجیکٹس کے باوجود سب سے زیادہ توجہ اسی جوڑی کی کیمسٹری نے حاصل کی۔ دونوں کے درمیان تعلق کی افواہیں 2025 میں اس وقت شروع ہوئیں جب انہیں مونٹریال سمیت مختلف مقامات پر ایک ساتھ دیکھا گیا۔ بعد ازاں ایک ویڈیو بھی سامنے آئی جس میں جسٹن ٹروڈو کو کیٹی پیری کے کنسرٹ میں شرکت کرتے دیکھا گیا، جس نے ان قیاس آرائیوں کو مزید تقویت دی۔ مزید یہ کہ دسمبر میں کیٹی پیری کی جانب سے ٹوکیو سے شیئر کی گئی تصاویر اور ویڈیوز میں بھی جسٹن ٹروڈو کی موجودگی نے ان خبروں کو مزید ہوا دی، جس کے بعد دونوں کو متعدد مواقع پر ایک ساتھ دیکھا گیا، تاہم اب تک دونوں نے اپنے تعلق کی باضابطہ طور پر تصدیق یا تردید نہیں کی۔ ٹریبیکا فیسٹیول میں ریڈ کارپٹ پر ان کی مشترکہ آمد کو شوبز اور عالمی میڈیا میں ایک غیر رسمی مگر واضح اشارہ قرار دیا جا رہا ہے کہ دونوں کے درمیان تعلق محض افواہوں تک محدود نہیں رہا۔