آئی فون 18 سیریز کی ممکنہ قیمت میں بڑا اضافہ متوقع

غیر ملکی میڈیا رپورٹس کے مطابق اس ممکنہ اضافے کی بڑی وجہ میموری اور دیگر چپس کی قیمتوں میں اضافہ ہے۔ ٹیکنالوجی مارکیٹ میں بعض بڑے برانڈز پہلے ہی اپنے فلیگ شپ اسمارٹ فونز کی قیمتوں میں تقریباً 100 ڈالر تک اضافہ کرچکے ہیں۔ رپورٹس میں دعویٰ کیا گیا ہے کہ اگر ایپل بھی تقریباً 100 ڈالر کا اضافہ کرتا ہے تو آئی فون 18 پرو کی ابتدائی قیمت 1199 ڈالر ہوسکتی ہے۔ موجودہ اندازوں کے مطابق آئی فون 17 پرو کی ابتدائی قیمت 1099 ڈالر رہی، جس کے مقابلے میں نئی قیمت تقریباً 9 فیصد زیادہ ہوگی۔ اسی طرح آئی فون 18 پرو میکس کی قیمت 1299 ڈالر سے شروع ہونے کا امکان ظاہر کیا جا رہا ہے۔ اس طرح ایپل کے نئے پرو ماڈلز کی قیمتیں پریمیم اسمارٹ فون مارکیٹ میں مزید اوپر جاسکتی ہیں۔ ایپل نے گزشتہ کئی برسوں کے دوران بنیادی آئی فون ماڈلز کی قیمتوں کو نسبتاً مستحکم رکھنے کی کوشش کی ہے، جبکہ بعض مواقع پر زیادہ اسٹوریج والے ماڈلز متعارف کرا کے قیمتوں میں فرق پیدا کیا گیا۔ دوسری جانب رپورٹس میں دعویٰ کیا گیا ہے کہ اس سال ایپل آئی فون 18 پرو سیریز کے ساتھ معیاری آئی فون 18 اور آئی فون 18 ایئر متعارف نہیں کرائے گا۔ مختلف لیکس کے مطابق ان دونوں ماڈلز کو 2027 کے آغاز میں پیش کیے جانے کا امکان ہے۔ واضح رہے کہ آئی فون 18 سیریز کی حتمی قیمتوں کا اعلان ایپل کی جانب سے باضابطہ لانچ کے موقع پر ہی کیا جائے گا، اس لیے فی الحال سامنے آنے والی قیمتیں ممکنہ اور غیر حتمی ہیں۔