فلمی صنعت کے سینئر ایسوسی ایٹ ڈائریکٹر قدیر ناز طویل علالت اور بے روزگاری کے کٹھن دور کے بعد انتقال کرگئے۔

فلمی صنعت کے بحران کے باعث قدیر ناز کچھ عرصہ ہدایت کار پرویز ملک کے صاحبزادوں کے پروڈکشن ہاؤس سے بھی منسلک رہے۔ پروڈکشن ہاؤس کی جانب سے اسلام آباد سے کام ختم کرکے کراچی منتقل ہونے کے بعد قدیر ناز واپس لاہور آگئے اور دوبارہ فلمی دنیا میں کام کی تلاش شروع کردی۔ انہوں نے بطور ہدایت کار بھی ایک آدھ فلم بنائی، جن میں عارف جمشید سہروردی کی فلم "زمانہ 420" بھی شامل ہے۔ طویل عرصے تک فلمی صنعت سے وابستہ رہنے کے باوجود قدیر ناز زندگی کے آخری ایام میں روزگار کے مسائل سے دوچار رہے اور بالآخر بے روزگاری کے دوران ہی اس دنیا سے رخصت ہوگئے۔ فلمی حلقوں کے مطابق قدیر ناز انتہائی نیک سیرت، محنتی اور خوش اخلاق انسان تھے۔ ان کے انتقال پر فلمی صنعت سے وابستہ شخصیات نے گہرے دکھ اور افسوس کا اظہار کیا۔ اللہ تعالیٰ مرحوم کی مغفرت فرمائے اور انہیں جوارِ رحمت میں جگہ عطا فرمائے۔ آمین۔